古天樂撻著唐詩詠 崔建邦嬲爆
古天樂同唐詩詠(Natalie)？大纜都扯唔埋喎﹗非也，其實古仔同詩詠因為合作拍攝電影《逃出生天》，竟然被指撻著，仲搞到一直同Natalie拖拖拉拉嘅崔建邦好火滾添！今日有報道話，自從古天樂欽點Natalie喺《逃》一片飾演佢女友一角，有知情人士就話古仔對Natalie照顧有加，連Natalie自己都話好鍾意古仔，仲話喺戲中一幕同古仔雨中咀嘴戲，令佢非常回味喎。
報道又話，古仔雖然同外界話冇同唐詩詠交換電話，但熟古仔嘅人都話佢私底下好like詩詠，又讚詩詠工作態度好好；古仔身邊人就話因為唐詩詠同古仔舊愛黃（金己）瑩同一個type，都係純純哋，又一樣叫Natalie，難怪古仔會對詩詠分外體貼。
對於兩人爆緋聞，報道話崔建邦口講唔介意，實情係回應時句句「醋底」。
邦邦今日就喺無綫電視城出現，佢就該報道回應時面黑黑話：「我唔會囉！以我所知就唔係。」問佢係咪同詩詠已經復合，佢又避忌話：「大家係好朋友。」
頁:
[1]