杏兒標冷汗 代母胡定欣 喪講黃宗澤 胡杏兒, 胡定欣

babigoh

胡杏兒同胡定欣兩位好朋友，唔止都係姓胡，而且共同進退，今日更有錢齊齊搵、首度雙雙出騷，現身尖沙嘴示範手錶。

除咗搵外快一齊，就連「做朋友」，胡氏姊妹花都要同步。噚日有報道話，定欣因為成日介紹筍盤俾杏兒、搞到黃宗澤箍煲失敗，亦令對方自覺好冇面，故此同定欣合作拍無綫劇集《貓屎媽媽》期間，黃宗澤當正定欣透明，拍劇咁耐一齊傾偈夾埋唔夠十句。

今日定欣被問到此事，佢就話篇報道好好笑，亦否認事件:「啲咩咩咩門派呀……咁樣，咁其實我哋係拍得好開心，呢啲係不實報道，睇完笑吓就算。」下一套由莊偉健監製嘅新劇《點金勝手》，佢同黃宗澤仲飾演兩夫妻添。記者問:「唔會因為杏兒而覺得尷尬？」定欣謂:「冇嘢需要尷尬!」當時杏兒忙緊印汗，不期然聽到自己個名、問咗句:「咩事？聽唔到。」定欣即說:「要唔要從頭再講？」杏兒都好醒，即說:「唔使!」兩女相視一笑，然後大笑。

定欣又補充謂:「呢啲私底下嘅事，都過咗去好耐0架喇(指杏兒與黃宗澤戀情)。」杏兒冷不防定欣幫自己做「代言」，即眼定定望住佢，定欣亦即刻「定晒」，望番杏兒，然後兩姊妹又一齊笑晒話:「係啦!」好鬼得意。定欣臨尾補充多句:「喺佢面前更加唔好講啦。」杏兒聞言尷尬低頭微笑。

之後定欣仍然好似唔識停咁，繼續講，杏兒就係咁抹汗，最後連定欣都察覺到老友在瘋狂標汗，杏兒即遞紙巾俾定欣:「你幫我抹啦!」定欣打趣道:「你唔好喊啦!」杏兒即還擊:「都叫咗你唔好講(黃宗澤)0架啦。」抵死到呢……

做完「代言」，講番定欣喺噚晚一集《衝上雲霄II》做「代母」劇情。定欣話都知道噚日一集引起大迴響，佢話拍嘅時候監製都話會咁，但佢冇理咁多，投入做戲，不過見到咁多評論，都覺得開心。