香港追星 STARHK - Powered by Discuz! Board

標題: 鬼差速遞.. [打印本頁]

作者: ming8602 時間: 2012-5-4 05:19 AM 標題: 鬼差速遞..

到達工廠大廈時, 剛好係三時五十分.
我睇一睇手錶, 根本唔洗走堂出來,而家上去既話,lift再慢都唔洗10分鐘時間.
如果唔係女友既話, 我根本就唔洗搵part-time, 更唔需要走堂.
簡單黎講,呢件事係由我岩岩追到手既同班同學eva開始.
由於時間關係, 由搵工到打電話約面試既細節我就唔講啦.
怪事就發生係我走出lift以後.

一般既工廠大廈都有幾部載貨電梯, 呢度都唔例外.
為左盡快到公司,我入左其中一部,按7字,再行樓梯上一層.
"景x實業公司", 聽個名根本就估唔到做咩生意.幸好我只係被"兼職速遞時薪30"既廣告吸引黎.
他們份工做咩我唔理,只要唔係犯法就可以.
速遞當然係常見既職業,但係兼職就唔多見,而且工作時間係【夜晚6-9】,呢d時間有咩好送呢?
走出lift先知道,呢度比我係外面睇到既仲要大.
「812號...812...係呢度啦」連公司名牌都冇一個,呢種公司會唔會好易執笠?
但既然黎左,就試下見啦.

叮---噹---!
奇怪,明明叫我黎面試,而家反而冇人?咁奇怪!
叮---噹---!
本來以為一時聽唔到門響,但係我企左10分鐘,不時都有禁門鐘.
咁樣都冇人應門,冇理由全部人都去哂廁所掛?
會唔會係我放假之後頭腦唔太清晰,睇錯左大廈名?落返去入口再睇清楚.
「嗯,冇錯呀,再上去睇睇」
我再次搭返岩岩間lift,一步一步行上鬼影都冇一隻既樓梯,再返去"景x實業公司"門口,再禁門鐘.
叮---噹---!
又係冇人應,簡直就浪費我既時間.不過既然黎到,就咁放棄又唔知點咁.eva一定又會嘈我.
諗諗下,不如試下打電話啦.如果連電話都冇人聽,咁我都冇辦法.
一打電話,門內就傳黎電話響聲,好明顯我冇找錯門啦.
但好奇怪,公司電話好快就有人聽.

「午安,景x實業」
「喂,係咪景x實業公司呀?」雖然呢個係好蠢既問題,但我估唔到真係有人聽電話
「係,請問搵邊位?」
「你好,我係黎面試架,我姓李」
「咁你而家位置係邊呀?已經過左10分鐘有多啦喎」
「我一早就黎左啦,但係禁左多次門鐘都冇人應門.」我真係小佢,擺明佢就惡人先告狀啦.
「冇可能,係唔係你去錯地方呀?」
「一定冇,你地係唔係812,8樓12室呀?我就係你地公司門口!」我用好肯定既語氣答佢.
「係咁呀?!你等陣啦,我而家開門」佢講完之前,放落左個電話
等左一陣,我見到門上面個防盜眼有個黑影閃過,本來以為終於有人開門,點知又是冇聲氣.
「你又話你係門口既?我而家開左門啦,咩人都見唔到喎」電話入面個8婆用高8度既聲音同我講
「李生,唔好再玩啦,我地既時間好寶貴架,再見.」
當時我真係魚蝦蟹都出齊,比個8婆搶先cut我線,時間控制得真好.
好啦,咁我走啦,去到樓下,我睇一睇大堂水牌,竟然冇一間公司叫"景x實業公司"
真討厭,連水牌都冇個,可以睇到呢個公司小得可憐!!
「先生,你搵邊間公司呀?」老看更走過黎問我,大概見到我上上落落,引起佢注意啦.

「唉..本來約左去"景x實業公司"面試既,而家唔洗啦」我好抱怨咁講
「"景x實業"??!先生,你講咩呀?」個老看更好似唔係好信咁,要我講多次.
「先生,你係咪搞錯左呀?間公司係金融風暴之後就執左啦,老闆就係公司燒炭自殺,之後就一直租唔到出去,你唔係同我講他地仲營業緊呀?!」
「唔係嘛!! 我頭先仲......」
「你唔信呀?咁我同你上去睇下!」老看更隨即拿左鎖匙就想沖上去.
我緊係死都唔上去啦,仲唔即刻走呀,好彩"佢地"冇請我咋.
返到去,我同返女友講,我地都覺得好奇怪,如果間公司已經冇左,咁邊間放d招聘廣告上報紙呢?
如果個單位真係丟空,咁防盜眼個黑影又點黎架呢?

歡迎光臨香港追星 STARHK (http://starhk.com/bbs/)